كثير نسمع مصطلح “تحليل المنافسين” ونحس إنه شيء كبير ومعقّد ويحتاج محلل خبير، لكن خلنا نكون صريحين… هي ببساطة إنك تراقب السوق، وتفهم وش يسوّون غيرك، وتستفيد من اللي تشوفه.
خلنا نبدأ خطوة بخطوة.
أولًا: وش يعني تحليل المنافسين؟
تحليل المنافسين هو إنك تراقب اللي ينافسونك وتشوف:
• وش يقدمون؟
• كيف يسوقون؟
• وش نقاط قوتهم وضعفهم؟
• وش تقدر تسوي أنت بشكل أفضل؟
الهدف؟ تكتشف الفرص اللي محد شايفها والثغرات اللي تقدر تغطيها.
طيب كيف أبدأ؟ هذه الخطوات 👇
١. حدد منافسينك
ببساطة، المنافسين نوعين:
• مباشر: يبيع نفس المنتج تقريبًا، لنفس الناس.
• غير مباشر: يبيع شيء مختلف، بس يحل نفس المشكلة لنفس الفئة.
مثلاً:
إذا عندك مطعم صحي، فمنافسك المباشر هو مطعم صحي ثاني،
أما المنافس غير المباشر؟ ممكن يكون تطبيق وجبات جاهزة أو نادي رياضي يبيع وجبات.
💡 نصيحة ملاحة:
حدد بين ٥ إلى ٨ منافسين عشان تطلع بصورة واضحة بدون ما تتوه.
٢. حدد وش بتقيّم
هنا تبدأ تصمم عدستك:
وش تبغى تعرف عنهم؟
اختر النقاط اللي تهمك في المرحلة اللي تمر فيها. مثلًا:
لو بتطلق منتج جديد؟ قيمهم على:
• تسعير المنتجات
• تنوع النكهات أو الأنواع
• أسلوب التغليف
• مدى تفاعل الناس مع المنتج
لو عندك مشكلة في المبيعات؟ قيمهم على:
• الحملات الإعلانية
• استخدامهم للمؤثرين
• جودة خدمة العملاء
• تواجدهم في المنصات
💡 نصيحة ملاحة:
خلك محدد، ولا تقيّم 30 نقطة… ركّز على أهم 5 إلى 8 نقاط.
٣. وش تمركز العلامة عندهم؟
يعني باختصار: وش الصورة اللي حابين الناس يربطونها فيهم؟
هل يتمركز كمنتج فاخر؟ ولا منتج اقتصادي؟
هل هو براند شبابي؟ ولا عائلي؟
حاول تحلل هذا الشيء من أسلوب المحتوى، طريقة التصوير، وحتى نبرة الردود.
